GEIR ÁGÚSTSSON OG KREPPAN ÓGURLEGA

 

• Halldór Laxness sagði eitt sinn að kommúnistar væru feykilegir besserwisserar, þeir héldu sig alvitra. Slíkt hið sama gildir um frjálshyggjumenn, rétt eins og kommúnistar tala þeir við fólk í kennaratóni. Þetta sést í nýlegu bloggi þess annars ágæta frjálshyggjumanns Geirs Ágústssonar.  Hann talar niður til nóbelshagfræðingsins  Paul Krugmans og kennir honum hagfræði. Krugman greyið hafi ekki skilið að orsök kreppunnar sé einokun ríkisins á peningaprentun. Verði hún gefin frjáls munu slíkar kreppur hverfa eins og dögg fyrir sólu. Þessi kenning er reyndar ættuð frá hinum svokallaða austurríska skóla í hagfræði en hann hafði m.a. sér til ágætis að gefa skít í öll reynslurök. Einn helsti forsprakki skólans, Ludwig von Mises, sagði að skilja mætti hagkerfið með því einu að velti því fyrir sér hvernig skynsamur maður myndi hegða sér við skilyrði frjálss markaðar, ekki þyrfti að rannsaka raunverulegt atferli manna. Að svo miklu leyti sem kenningar skólans eru prófanlegar þá fæ ég ekki annað séð en að kenningin um peningaeinokun sé röng. Það urðu stórfelldar fjármagnskreppur í Bandaríkjunum áður en Seðlabankinn þar tók sér einkarétt á prentun peninga. Og hvernig hafa frjálshyggjumenn eins og Geir hugsað sér að skýra þá staðreynd að eina kreppulausa skeiðið í sögu kapítalismans var ríkisafskiptaskeiðið mikla á fyrstu áratugunum eftir stríð?
•      Winston Churchill sagði réttilega að sá sem ekki er kommúnisti tvítugur hefur ekkert hjarta, sá sem enn er kommi þrítugur hefur engan heila. Ég bæti við: Sá sem ekki er frjálshyggjumaður tvítugur hefur hvorki hjarta né heila, sá sem enn er frjálshyggjumaður þrítugur er líklega á launum hjá auðvaldinu.

Athugasemdir

[Óskar Helgi Helgason (IP-tala skráð) 14.10.2008 kl. 22:59]

Heill og sæll; Stefán !

Má ekki álykta; í ljósi seinni tíma sögu okkar, að frjálshyggjan sé;; einskonar Níhilismi okkar daga ?

Sjálfbirgingsháttur; og raunverulegt mont fylgjendanna, lýsir eins konar firringu huglægt, sem hlutlægt, hefir mér sýnst; allavega, síðan Hannes Hólmsteinn Gissurarson gjörðist einn fremsti boðspredikant þessa alheimsvanda lausnara, á sínum tíma.

Með beztu kveðjum, sem fyrr /

Óskar Helgi Helgason  

[Stefán Valdemar Snævarr, 15.10.2008 kl. 12:21]

Þakka einkar vel skrifaða athugasemd. Sammála.

[Sveinbjörn (IP-tala skráð) 15.10.2008 kl. 16:59]

Það ku hafa verið Willy Brandt sem lét þetta út úr sér, en ekki Churchill.