VEI YÐUR FRÆÐIMENN OG FARISEAR, HRÆSNARAR!

  

Ömurlegt er að fylgjast með málflutningi alltof margra einstaklinga um atburðina fyrir botni Miðjarðarhafs.

Vinstrimenn fordæma bara Ísrael, nefna ekki morðæði Hamas, hægrimenn einblína á illgjörðir Hamasliða en verja yfirgang Ísraela og fjöldamorð þeirra á Gasabúum.

Vinstrimenn nefna ekki kúgun Hamas á konum og samkynhneigðum, harðstjórn þeirra og spillingu PLO.

Hægrimenn láta hjá líða að ræða yfirgang landnema á Vesturbakkanum og þá staðreynd að hreinræktaðir fasistar sitja nú í stjórn Ísraels.

Samkvæmt skjölum, sem lekið var í fjölmiðla, ræða ráðamenn þann möguleika að hrekja alla íbúa Gasasvæðisins til Egyptalands. Það heitir „þjóðarbrotshreinsun“ á venjulegu máli.

En ekki má gleyma „afrekum“ Hamasliða, þeir  eru slík varmenni að vel má vera að þeir geri sér vígahreiður í sjúkrahúsum og einkaíbúðum.

Hvað sem því líður þá hafa hvorki hægri- né vinstrimenn mikla samúð með Palestínumönnum og Ísraelum.

Þeir hafa aðallega samúð með sjálfum sér, með sínum pólitísku kreddum. Deilan snýst í reynd um Bandaríkin, vinstrimenn eru á móti Ísrael af því að BNA styður það, hægrimenn halda með Ísrael af sömu sökum.

Í Rómeó og Júlíu Shakespeares segir Mercutio um Capulet og Montague  ættirnar sem börðust um völdin  í Verónu: „A plague o‘ both your houses!“

Athugasemdir

[Sigurður I B Guðmundsson, 7.11.2023 kl. 12:32]

Það er margt til í þessu hjá þér en held að fáir samþykkji þetta samt. 

[FORNLEIFUR, 7.11.2023 kl. 15:50]

Hreinlæktaðir fasistar sita ekki í stjórn í Ísrael. Það er eins vitlaua yfirlýsing og að segja að Snævarar séu allir gyðingahatarar, þó einn Snævarrinn murraði eitthvað hér um árið um demanta Dorritar Moussaieff. ÉgG skrifaði um þann Snævarr í grein sem ég hef ritað um gyðingahatur á Íslandi, en það á ekki við um S. Valdemar Snævarr.

[Stefán Valdemar Snævarr, 7.11.2023 kl. 17:01]

Fornleifur, mér dettur ekki í hug að segja að allir ráðherrar Ísraelsstjórnar séu fasistar. Mér er í nöp við Netanjaú en hann er ekki fasisti. En ég á erfitt með að kalla Ben-Gvir eitthvað annað. Nefna má að Paul Berman leiðir að því getum að róttækur íslamismi eigi sér rætur í evrópskum fasisma. Sé það rétt þá gildir það um stefnu Hamas, fyrsta stefnuskrá þeirra er gegnsýrð Gyðingahatri. Þeir vitna meðal annars fjálglega í Hina vitru síons og segja Gyðinga bera ábyrgð á kommúnisma o.s.frv, gamla fasistalumman. Þeir draga í land í seinni útgáfu, hvort sem það var taktík eða eitthvað annað. 

[Bjarni Bjarnason (IP-tala skráð) 7.11.2023 kl. 20:14]

Það eru nú full miklar alhæfingar í þessu hjá þér. 

T.d. að einungis vinstrimenn séu á móti morðæði Ísraels. 

Ætla má að fjöldi manns sé á móti fautalegri meðferð Ísraels á Palestínumönnum bæði nú og fyrr, þetta séu ekki endilega allt vinstrimenn.

Meira að segja í sjálfum Bandaríkjunum eru 66% fylgjandi vopnahléi milli Ísraels og Hamas, harla fáir af þeim trúi ég að teljist vinstri menn upp á íslenska staðalinn.  

Eða þetta: "Hvað sem því líður þá hafa hvorki hægri- né vinstrimenn mikla samúð með Palestínumönnum og Ísraelum."

 Hvaða bull er þetta eiginlega?

Nú um stundir blöskrar fólki morðæði Ísraels á Gaza, hátt í 5000 drepin börn hafa nákvæmlega ekkert með Hamas að gera og geta ekki verið ábyrg fyrir morðæði þeirra gagnvart Ísraelum nýverið. Samúð með þeim og öðrum börnum á Gaza hefur ekkert með að gera samúð með Hamas. 

Vissulega er heldur efiðara að hafa samúð með fautanum í málinu Ísrael þó auðvitað gildi sama um börn þar og annars staðar. 

En Stefán, ekki bulla svona ferlega þú getur gert miklu betur en það. 

[Stefán Valdemar Snævarr, 7.11.2023 kl. 22:03]

Bjarni, þessi færsla er skrifuð til að ögra, meðvitaðar einfaldanir til hvetja menn til umhugsunar. Auðvitað veit ég að málin eru miklar flóknari en þetta.